第1012期 壹週刊
面子攸關
今日女生的妝扮icon,離不開超黑眼線、戴大眼仔及黐假眼睫毛——不過好姊妹都覺得要一味靠黐的假眼睫毛,人手施工高難度,難黐得自然又唔知邊款同質地最好……得得得,今期就詳細教你黐假眼睫毛步驟,再加真人測試,幫你揀埋邊款至啱東方女士眼形 ,仲等咩,嗱嗱臨買齊架生跟住做啦!
假睫秘訣
「工欲善其事,必先利其器。」化妝師Janice表示動手黐假眼睫毛前,當然要先準備工具:鏡、睫毛夾、修剪眉毛用的眉剪及眉鉗。至於黐眼睫毛專用的膠水,則一定要揀白色,乾後會變透明,效果最自然。
黐睫 Step by Step
Step 1
先用睫毛夾在自己的真睫毛上,由睫毛根部/中間/末端分段夾翹,目的令真假眼睫毛黐上後,能自然的混合一起。
Step 2
輕捏着假眼睫毛的頭尾兩端,幫佢做柔軟體操,屈曲伸展約10次,令假睫根部更柔軟及增加弧度。
Step 3
將假眼睫毛放在眼睛上度位,最佳長度,應集中眼睛中間至後半部,修剪時盡量剪尾部位置,有助效果自然。
Step 4
在假眼睫毛根部擠上膠水,記住分量唔好太多,直接用棉花棒搽上薄薄一層便可,待10-15秒,膠水呈半乾狀態,才黐上。
Step 5
眼睛向下望,用眉鉗夾住假眼睫毛末端,由眼部中間位置開始黐,慢慢向左右兩邊緊貼在真睫毛根部。
Step 6
眼尾位則最好用眉鉗輔助黐上:以免手指擋住視線,難以對準位置;指頭鈍倔笨拙,不及眉鉗靈巧幼細,整理會有難度啊!
Step 7
最後用手指將假眼睫毛逐綹輕輕向內推,使其與眼皮更緊貼,同時調校假眼睫毛的高低,想誇,可輕手向高撥;要自然則向下掃。
卸睫 Step by Step
卸假眼睫毛時,千祈唔好大力撕扯,應以沾有卸妝水的化妝棉敷約一分鐘,待膠水軟化後才輕輕撕下。
Step 1
先用食指按住眼皮位置。
Step 2
由眼頭開始、將假眼睫毛慢慢向眼尾撕下。
Step 3
以棉花棒沾上眼部卸妝液,一下一下向外擦拭假眼睫毛的根部膠水漬。
Step 4
如果on top搽睫毛液的話,唔好漏咗卸埋假眼睫毛,待風乾入盒,可循環再用。一般人造纖維質地假眼睫毛,平均可用2-6次。個人心水是日牌Koji最襟用,柔韌度最適中,試過循環再用15次斷開先掉。
假睫測試
坊間假睫款式多不勝數,要效果睇落自然,唔可以單睇款式外形,最重要配合到眼形。一般交叉式重疊的人造纖維假眼睫毛,有拉長眼形效果,比較接近亞洲女性的睫型。前短後長的款式,扮東瀛娃娃至拿手,Theresa都係黐呢款扮日本妹!如揀濃密誇張效果,一定要襯番色濃的眼妝,如smoky eyes等,否則效果好突兀。
Hollywood Eye Lash $39
賣點:根部以透明的樹脂材料製成,黐完都唔多覺,啱天生短睫毛兼稀疏女生扮濃密。
易黐度:★★
自然度:★★★★
易卸度:★★★
評語:根部偏硬,眼頭眼尾位置容易彈起,黐後一定要用睫毛液將真假眼睫毛黏合,但勝在效果超自然,啱OL返工用。
ylure Tokyo Lashes $38
賣點:睫毛長短不一,似搽咗增長睫毛液,鳳眼女生想扮baby最啱。
易黐度:★★★★
自然度:★★★★
易卸度:★★
評語:睫毛本身微微鬈曲,效果自然,黐後令整個妝容睇落精神咗!容易黐,不過纖維質地亦容易斷,頂多循環用1-2次。
Andrea Modlash Starterkit $38
賣點:100%人手製造,前短後長設計,有助將眼形矯圓變貓目,兼附送膠水及睫毛夾,一條龍服務周到。
易黐度:★★★★★
自然度:★★★
易卸度:★★
評語:毛質偏硬,屬中度自然效果。睫毛長度啱亞洲女生眼形,基本上唔使修剪,黐後能將眼形變橢圓,眼垂及眼長女生必備。
Cosmos Self-sealed Eyelashes $28
賣點:睫毛本身已有膠紙,直接黐上乾淨利落,設計濃密如羽扇效果,毋須搽睫毛液,雙眼似叉足電。
易黐度:★★★★
自然度:★★★
易卸度:★★
評語:根部黑色弧線偏粗,毛質濃密偏長,感覺似畫咗眼線,頗誇!卸妝時容易撕甩纖維,唔襟用。
Beauty World Rich Accent Eyelash $29
賣點:一束一束的設計,啱分段修飾眼形拉上補下之用,黐法容易,新手入門最啱。
易黐度:★★★
自然度:★★
易卸度:★★★
評語:質地好硬好膠,黐後感覺好假兼唔舒服,有敏感痕癢同好想捽眼。論效果,眼睛輪廓突出女生較啱。
Ardell Elegant Eyes $38
賣點:交叉形,兼有少許閃粉,乃派對動物夜蒲必備恩物。
易黐度:★★
自然度:★★
易卸度:★★★
評語:根部硬,難黐,附送的膠水屬紙包即棄形,易擠出過多分量兼不能保留下次使用,唔user-friendly,效果又濃密誇張喎!
Bi Joie Black Lash $59
賣點:超黑濃密的扇形設計,勁hit,由旺角MK去到水著o靚模舉目皆是。包裝盒背面仲有插圖步驟教你黐。
易黐度:★★
自然度:★
易卸度:★★
評語:質地硬,難黐,令眼部有少許痛;質感重,好墜,黐後有少許遮擋視線,啱襯smoky eyes或粗眼線的濃妝用。
Koji Takako Style Eyelash $55(冠軍)
賣點:針對眼尾位置加長的設計,效果自然,細眼或垂眼女生最啱。
易黐度:★★★★★
自然度:★★★★★
易卸度:★★★★★
評語:根部及毛質柔軟,容易黐,能將眼形拉長,效果自然唔誇張,勝在睫型百搭,乜眼形濃淡妝都啱襯。
銷售點:
莎莎、卓悅、city'super - (id:kenwchch)
留言列表